La sunada l’ è sempar quela! Che paga l’è sempar la pora gent, oltar che stori! Em laurad cinquant’ani senssa mai andà al mar e adess la ‘n darà a fini che i sbasaràn la penssiòn. Ga mancaress anca questa, cul metano c’lé car m’è al fögh... Sperem che Bossi al tegna dür dabòn sü ca roba chi, almen ssü questa.Nüm sem mai andai a purtà i soldi a l’estero e sem no quei che cur in cumün a cridà par fass dà la buna man. Iu vist a la televisiòn? In Svissera gh’è la cacia ai casset ad sicüressa... Pütost che pagà i tass i cumenda ad Milàn i van in Svissera. Nüm invece i bulett dla lüz e dl’acqua curim a pagai prima amò dla scadenssa: par pagüra da dasmentegass. Ad pan na trem via miga, i vanssoti d’ incö i vegnu bon pra ‘l di dopu. E quand andem in cesa fem sempar l’uferta anca se g-nem pochi in sacocia, parché gh’em amò un po’ d’ rispett. A Ruma ad vargogna e d’ rispett a g-nan miga, ma propi miga! I curu apena al so cadarghìn. I mangiu da re e i pagu una cica, i viagiu senssa pagà al biliett in prima class, al cinema l’è gratis, al telefono la pagu no, l’auto l’è bleu cun l’autista cul capel in testa e alura ad mult par lur a g-nè mai gnanca vüna. Nüm paghèm tüt quel che i na disu da pagà, e pö ...a Ruma i sa fan la panssa e a num puvreti na tuca pagà anca par lur! Propi lur che i mandu i soldi a Napoli e a Palermo parché là a bass ian fai tanti camei! E al bèl l’è che i ga mandu i soldi nosti, milion e milion che gheva da restà chi a ca nosta... Che béla vita! Da 150 ani la va avanti sempar inssì. Nüm laurem, paghem e sa truem cun dü didi in dal naz. In bassitalia i lauru poch e gnent, i pagu una bèla cispa e i sa trövu i soldi in sacocia bei coldi! L’è propi bèla questa. Vuriu scumet che adess i salvaran i pruincc e i cumun sicilian e i nosti no? Lod l’ha finid da viu anca se l’è senssa debat, ma i mandaràn avanti Benevento e cumpagnia.L’è no giüsta, l’è ura da finila. Sem in mez al Po e l’Adda, i van tegnüdi d’ögg almen du stagiòn a l’an, sa tirem ssü i manich quand l’è al mument e curim su l’arsu: senssa la Pruincia restarem senssa mezi né perssunal. E pö, l’è gnamò finida: par che ga da sparì i cumun picinìn: propi quei in due tüti i lauru senssa met gnent in sacocia. I sparissu par risparmià: ma ian risparmiad fin a ier, sindich e asessuri i lauru gratis o quasi!Cara la mè gent, vla disi cui bun maner: nüm sem no italiàn dla cua, e quand l’è trop l’è trop. Violtar bei pustadi süi cadarghin a Ruma vuriu capila si o no?
© RIPRODUZIONE RISERVATA
