Se anca el brau fiöl Kimi el piaš miga a tüti, Pinìn e Tugnon divisi da Antonelli
LA VIDEOLETTURA DEL RACCONTO
Al bar Sport a discutere del campione che ha riportato il titolo di Formula Uno in Italia ma risiede a San Marino
Lettura 2 min.Al bar i gh’èn amò Pinìn e Tugnon che tra un rus e un olter, ‘me dü tarmòn, i parlu de sport. E se un an fa (ve se ricurdì?), i èru ‘dre a tacà lit sül tènis, adés gh’n’an süle machine. St’an va de moda la Formula Uno, vist che da quand Sinner el s’è fai mal ‘st’estàd, del tènis gh’na frega miga pü tant a gnisun, propi ‘me ‘n temp. Insì via vün suta un olter: capìd chi l’è? Cume no, ma Antonelli!
Il dialetto sul "Cittadino" - Pinìn, Tugnon e... Kimi Antonelli
P: «Ué Tugnon, èt vist ch’em vinciüd el Mundial de Formula Uno? L’èra dal temp de Carlo Cùdega che sücedèva no».
T: «Dabon, l’ültim l’èra stai Alberto Ascari, nel Cinquantadù e nel Cinquantatrì e prima de lü duma un olter italian gh’l’èva fai, Renato Farina nel Cinquanta. Ma dim miga che adés te gh’è da rangugnà anche sül nos Kimi».
P: «Ma, te disarò che son bèle un po’stüf da vedel en televisòn: amò ‘n po’ el me salta föra anca d’la gamèla de lat la matina!».
T: «Ma che parlà da ciula. Per forsa te s’la trovi in tüti i cantòn: l’è giun, l’è garbàd, l’è šu a la buna e pö t’la ripeti amò, dèrv ben le urégie se i èn no bele ciuche anca lur. L’a fai ‘na roba che capitèva pü da setantatrì ani. E pö finalment quand se parlarà de Formula Uno en Italia sarà pü duma la Ferrari, la Ferrari e amò la Ferrari. Aria növa cara ‘l mè Pinìn, arià növa!».
P: «Ah sì, sèt sicur?».
T: «Ma brau, suta ai fiuléti finalment, in un Paìš ‘me’l noster ‘due gira semper quèi. Sa gh’èt da di’? Gh’èt un qual dübi?».
P: «Per l’amur, diši miga ch’l’è no brau, garbàd e simpatich, p’rò....».
T: «E alura ‘sa burbòted, o pentula de fašöi».
P: «No gnent, dišì duma che anca lü, me tanti prima de lü per l’amur, le tase i a paga miga chi da nüm, ma in un olter cantòn. Sèvet che Antonelli stal a San Marino?».
T: «Ma sì, l’èvi sentìd, ma mi m’na frega no! Basta ch’la duminica el vinć le curse e son tüt cuntent istés».
P: «Brau martròn, fa gnent se dopu ti e i to cumpari si i prim a s-ciunfà perché gh’è miga de danè! “E me tuca ‘spetà dü ani per fam veda a l’uspedàl”, “E le strade i èn tüte ‘na büsa”, “E me tuca ‘nda ‘n pensiòn a cenvintani”, e via de ch’la sulfa chi».
T: «L’an pasà te gh’l’èvi sü perché Sinner el sta a Montecarlo, perché l’èra miga ‘ndai ai giüga la Coppa Davis, che pö em vinciüd istés, e perché l’èra miga ‘ndai da Mattarella; e stan te gh’l’è sü amò. Certo che t’sé propri un bel laù».
P: «Ah saresi mi el bel laù?! Gh’è da rid! Me par un mund cul cül ‘n pr’ari. L’è giüst che tüti i fasu quel che gh’n’an vöia, p’rò quand dopo i a vedi cul Triculur en man me se ‘nvèrsa la giurnada. Al nos Paìs i ghe vöru tüti ben fin quand ghè no da dèrv el bursìn, dopu i scapu tüti ‘m le lipe. E miga duma i spurtivi n’è, anche tüti quei che da semper i te dišu: “Vöt la fatüra o no?”».
T: «Dabon Pinìn, ‘me dišèva nos Signur: “Chi è senza peccato...”».
P: «Aé Tugnon. Pora Italia, ‘due le tase i a pagu semper e duma i soliti ašu!».
DIZIONARIETTO
piaš miga/piaš no - non piace
frega miga/frega no - non interessa
(miga è usato in parte della Bassa, no altrove)
tarmòn - tarme giganti, brontoloni
dal temp de Carlo Cùdega – tanto tempo fa
rangugnà – lamentarsi
gamèla – scodella
martròn – ingenuo, poveruomo
s-ciunfà – rompere le scatole
un bel laù – persona particolare
cul cül ‘n pr’ari – alla rovescia
© RIPRODUZIONE RISERVATA