In pais birloca un sac ad maruchìn

«L’è tame in dal cinquanta, cinquantadu, cinquantatri...quand gh’èra la gent in piassa a spetà ch’ ia ciamèvu pr andà a fa una quai ura ad laurà! Quei ieru tempi grami, sa stèva in piassa cui man in sacocia e gnent in taula! Gh’èra da ciapà cal poch che ruèva e tanta grassia! Dopu tanti ani, anca incoe al laurà l’è inssi, gh’è gnent da fa: busugna ciapal cuml’ è. Quand andevam a cargà a Milan a la Pirelli e gh’era sciopero,spetevam meza giurnada e na tuchèva dorm foera. Erla giusta ? E ghèra gnent da fa! Seram giun e gh’ èvam voia d’andà, da sta mai fermi, sempar a laurà, parché a cuntassla su sa guadagnèva gnent. E capivam no al sciopero, parché seram dla rassa da quei che ièru sempar prunti a dass da fa e vun che laurà par so cunt al cunuss no al sciopero. Parchè al laurà busugna ciapal quant al gh’è, oltar che stori. La siura Marciagalia la ga arsòn: in Italia sem fermi tame una tartaruga. Ad laurà a g-nè no e lur, chi van tuti i di a la televisiòn a parlà, i g’han in ment i fest e i ca ad Montecarlo, oltar che al laurà dla pora gent! Putardia: ma gh’èva miga da essagh du milion ad posti pri giun un para d’ani fa o zu da lì?

Al fato l’è che adess i siuri dla pulitica i g’han in ment i so afari e basta. E poe voei di anca questa: sem diventadi critich ad buca e tanti laurà i voeru fai pu, oltar che stori! L’è par quel che riva tanti extra comunitari, tuta pora gent che, quant i i vedu cume num sem furbi a schivà un sach ad dueri, incoe pussè che ier, lur, che ièn miga tuti cuoiòn, l’han capida al volo e i fan istess!

Vuraressi di che prima sem num che gh’em da rispetà dueri e legg dal guern e i capuriòn dla pulitica i duaressu dà lur l’esempi par primi.

Adess in pais birloca un sac ad maruchìn e cumpagnia bela. A fianch a mè fioela sta un maruchìn cl’è diventad italian. La so dona la g’ha una fiulina picinina che la par un angiulìn. Quand la guardi ma disi in tra par mi: putardia, l’è un amur, che mal poedla fam ?

In piassa gh’è una fila ad ca vegi e mezi voeidi, sui marciapè a fa una fumada i gh’en sempar lur, num sem sparidi tuti: cuiòn la mè Rusin, ma senssa i maruchin e i egizian la siu che a mezdi dla duminca in piassa ta pudaressi balà biut ? Mi disi una roba: mi la badante la voeri no, putost vo al ricovar o mei amò: sto a ca mia in da par mi, disturbi nissuna e ma rangi par mè cunt. Guardi la television ch’ la ma fa cumpagnia...Fo un giret a l’ustaria par ciciarà cui mè soci e son a post. Cert che quei dla television ièn sempar rabiusi mè can! Quel là al ma par al duce: al ga un sac ad soldi e un sac e mez d’aucati e alura al cred da pudè fa tut quel che al voer: cui don e cui television, cui senaturi e cui parturi! Sacramenciss, ma g’al no un po’ ad vargogna? Roba da dag du calnadd par fagh truà un po’ ad santiment! Ma cal penssa a truà al laura pri giun cl’è mei! Che mi quand vedi i fioei birlucà al bar ma ven la pell rissa! Lu l’ha fai su Piuntel, Segrà e Milano Due quand gh’era Crassi: l’è stai propi brau in dal so mastè, ma cuiòn la mè rusìn, i laurà ia ciapeva tuti lu! Ma va a munz i rati!

Cara al mè president e cavalier, i ani i passaràn anca par lu, oltar che stori! E sa ga restarà? Tuti i so soldi la faran no diventà pussè giun e tuti i so don meno a mo!

Mi, par mè cunt, cerchi da vanssam la testa a post cun la mè cussienssa e speri da lassà un bel ricord. L’è questa la roba pussè impurtant par num veggi, el vira si o no?»

(testimonianza di Bigiotu Cericu caretè)

Pierluigi Cappelletti

di Pierluigi Cappelletti