Quand gh’è stai al funeral dal guardiòn ad Vori, m’è restad in di oegi e in dla ment par tüt al dì una questiòn. Sütèvi penssagh e g-na ’ndevi foera no. Va capita mai da ess salütadi da un quaidün e da restà tame quel dla mascherpa, parchè si bon no al mument da ricunuss quel che va salüda? A mi m’è capitad propi quand ian purtad ssü Giulio la guardia e poeu, un qual dì dopu, ho scupert tütt d’un bot chi l’èra, ma...urmai l’èra trop tardi par turnà indrè!Go in ment che seri fai che ven föra dla cà dal por Giulio e ‘ndevi adrè al mort, che a spala al vigneva purtad sül car. Cunussevi ben Giulio e tüti i volt che la videvi, grand e gross e malingambad, a ven ssü dal valunìn cui so dü stampell, ma fermèvi vulentera a fa dü parol cul sociu di Cumbatenti. Al dubass dal funeral, rivadi ssü dal buchiröl dla ca dal mort, gh’èvi la testa cla penssèva a un oltar funeral da dü ani prima, quel da mè papà, e seri un po’ cun la candila al naš. Ben, intant che ma mitèvi dadrè dal car, passi a rent a vün, ma scapa l’ög e vedi che ‘l ma fa al buchìn da rid, par salüdam senssa fa burdèl e cun tüta l’educassiòn che al mument al dumandeva. Mi, che seri cun la ment ai morti, l’ho guardad apena apena, ho fai anca mi un moch par salüdàl ma senssa ricunussal e son andai adrè al car che l’èva inviada in ver la cesa.Pro, indren da mi, sütèvi a penssà a quel che m’èva salütad e ma disevi: ma chi el, ma par da cunussal, lo samò vist... Ma seri bon no da fam ven in ment al num! Vara ti che castigh! Cla roba lì la mè stai in dla testa par tüta la mesa, ma gh’è stai gnent da fa. Püssè ga penssevi e püssè ma pariva da cunussal... ma al num precis al salteva föra no. Eh, che brüta roba ven vegi! Cume diséva sempar mè nona... Ma cuiòn, mi son miga veg: go gnamò gnan sant’ani!Ben, la roba l’èvi urmai dasmentegada, quand pochi dì dopu ma scapa l’ögg sul Citadino e vegni a savè che Cècu l’è ‘ndai anca lü. Tüt d’un culp ma s’è dervid la ment e son restad gnan mè mi. A guardà la foto da Cecu cun la pipa in buca e i dü baffi negri, chissà parchè m’è gnüd davanti tüt d’un bot cal facìn suta al baschett gris che meva salütad al funeral dal guardiòn...Al m’eva guardad cun dü ugieti dulssi e disincantadi, cuarciad in d’ un bel paltò culur camel, parchè cal dì là feva un fregg da can: mi l’ho guardad, l’ho salütad par ess no sfassad e ho girad la facia, a caminent adrè al car dal mort. Cara al mè Cècu, ta vedi cume se füss stai ier: sa ga vuraress che Maietti al ma dess una man par fam truà i parol giüsti... Ieru ani e ani che seram visti, ma ta gh’èvi un’espressiòn cume se t’avessi vurssüd salüdam un’ültima volta! Gh’et in ment quand t’ho ciamad a Vori a presentà al to libar in dialett... E pö ta seri gnüd un’oltra volta e ta m’evi lassad senssa parol davanti a la muscabifusca: che bel sentat parlà tame mè nona! Di volt gh’è di perssun speciai che ta cunussi e pö, anca senssa vegh tanti ucasiòn d’oltar par vedass, sa resta amisi cul cör e cun la ment, cume se avessam passad inssema chissà quanti rob bei. E Cècu par mi l’era propi vün da chi perssun lì.
© RIPRODUZIONE RISERVATA
