Oh mama che fregg! Sa ŝela e sa sgüia! Ma mi ma par che in genar è slad sempar. Anssi, una volta oltar che
ŝlà! Andevam a cercà suta i teci di portagh i candiloti ad giass che pendeva ŝu e ia ciucevam tame ghiaccioli. Da fiöi videvam no l’ura che fiuchèva, e no par fa “l’uomo di neve”, cume dis incö i fiulìn. Vedevam no l’ura che fiuchèva par giügà a tirass i bal ad nöu! E al di dopu, quand ŝlèva, fevam la sgüiaröla ŝu dal valòn a bass. Finid la scola, curivam a cà e pö in piassa a tirà i bal ad nöu cuntra la porta dla Sigulìna, una dona anssiana no spusada, o cuntra la porta dla ca ad Cristina e Diobelo, dü anssian che steva in piassa. La Sigulìna l’era un dunòn che fèva la facia cativa, la ga bravèvu ai fiulìn che tireva la nöu. Püssè la braveva e püssè nüm tirevam i bal ad nöu cuntra la so porta, le la ciapeva in man la scua e nüm scapevam mè legur!
Cun quatar tochi d’assi e dü gamb di cadregh inciudadi par ben fevam la slita, pö la purtevam in piassa e... ŝu dal valòn ingiassad!
Gh’èra sempar un quaidün che na bravèva, parchè a furia da sgüià tirevam la strada lüsstra m’è un spegg e la gent che passèva la gh’èva pagüra da cascà in tera. Par sculdass i man ia mitevam in buca par sent al calur dal fiad, gh’èvam no i guanti da sci e quei che ghèva un para ad guantìn ad lana, dopo cinch minüti che i giughèvu cun la nöu i sa truèvu i guanti bagnadi mè pulastrìn, alura ia cavèvu e i fèvu senssa!
Andevam a ca quand vers i cinch ur vignèva scüri: cui pe bagnadi, al naŝ russ e i man sladi. Ma seram cuntenti tame la mana. E se un qual fiulìn al ciapèva dü o tre bal ad nöu in facia, andèva no a ca a lumentass cun so papà e so mama. Al di dopu l’era amò da capo: prunti a giügà cun la nöu in piassa insema ai so amiŝi, a imità quel che fèva quei püssè grandi.
Tame cla volta che ian tirad tri bal ad nöu cuntra la bareta ad Pasquin, che al passèva in piassa cul so caval bianch. Cuiòn la mè Ruŝin: Pasquin al Fallsu l’èr no vün che tla fèva passà liscia. L’ha ciapad in man la früsta e... via, a curagh adrè ai fiöi. Nè andai vün dapartüt e da cla volta là pü nissün al sé sugnad da tirà la nöu cuntra al car ad Pasquìn.
© RIPRODUZIONE RISERVATA