È passad anca San German! E pudevi no fa finta ad gnent dopu che don Antonio Poggi al m’ha invitad ala so messa di sessant’ani d’urdination. Cara don Antonio, grassie grassie. Gh’èvi tri ani in dal cinquantasett quand tè di la prima messa a Sena e m’ha fai propi piazè ricurdà chi tempi là.L’è stai un’ ucassiòn par ved anca suor Mariuccia, una Poggi cume ti.A San German gh’è la Sagra a Senna a l’ultima dal mez ad lui, ma l’è sempar una festa senssa musica, senssa balera, senssa autopista. Una festa dla gent che cred, dla gent che va in cesa e poe la fa festa in cà aturn al taul, cume ma disèva sempar Costante, al fioel ad Carlètu al Tamburìn, che n’ha lassad propi trop prest! Una volta sa festeggèva inssi. I tempi i cambiu, e busugna di che sabat passad a la prucession dla Sagra ho vist no tanta gent. Gh’èra gnanca la banda ( e l’è no al prim San German che la manca…) e a mi, che ho sunad in dla banda ad Sena par 35 ani, m’è dispiassud ved no la banda fundada da don Merlini in dal 1939 par fa dla buna musica in di funssiòn religiusi! E’ restad mal anca Davide e Marco, du amisi cui cugnumi ad Senna D.O.C.: vun l’è Franchi e l’oltar Cremonesi, e ièn impegnadi da sempar, cume ieru i so pà, cun l’Uratori. Passienssa!Putost, vurevi di che intant che caminevi in prucession, m’è passad davanti a i oegi la Sena d’una volta.Apena foera dla cesa, sul cantòn dla Via Angelo Grossi ho vist Cumiolu in su l’us dla so lavanderia e in facia la butiga di stoff ad Ghita, propi dapart al tabachè e al negossi dal macelar dla famiglia ad don Nando; poe m’è parss da sent un prufum ad pan che vulèva in dl’aria: al gnèva foera dal furn ad Gori. Sem passadi davanti al Bar ad Nando in facia al municipi, e in dla butiga ad Minciòn sa videva pend zu i salami intant che Al Tètu al tirèva foera un’infurnada ad pan bianch. In Via Dante in facia al figh dal Pièro, Antonio al Macelar al gnèva foera dal buchiroel cun meza vaca in spala e la purtèva in dal so negossi, par preparà la vedrina dla Sagra. Suta la porta ho vist Angilòn e Nucent, ma al Trianòn, l’ustaria dla cuperativa di russi, al gh’èva i taulìn cui cadregh voeidi: e la porta l’èra sarada in segn ad rispet par la prucessiòn. Anca all negossi ad fruta ad Santin l’èra mez sarad ssu, ma sa sentiva prufum ad verdura fresca e sul marciapè tri inguri grossi e verdi mè l’erba i spetèvu da es taidi e da fa ved cume ieru russi. Sem in piassa e su la destra al negossi dal barbè Cericu l’èva tirad zu la clèr, cume anca la Cuperativa la Sennese. Ho vist Ceca Salèra fa l’ugialìn da la finestra e sul buchiral gh’èra una fila ad vasi pien ad gerani: ièru quei dla siura Rosa dal Tamburìn. Un tratur cun Mangium e ‘Ndum al vulant al s’è fermad da Pino al benzinè e l’ha smurfad al mutur, intant i clienti dal cafè dal Luinè i sberlugèvu da la finestra. Davanti a la lunga fila ad gent in prucessiòn, Mangagnìn cume sempar al guidèva al corteo mei che la guardia: guai a quei che vigneva innans senssa fermass! Gh’èra una fila che la finiva pu, cui don cul vel in testa e tanti omi cun la camisa bianca e i managh fai ssu pral calur. Ho vist che Bursanera al gnèva ssu dal valòn dal Padul e sul cantòn dal Monument la so dona Teresina la spetèva da dreu la butiga dla rivendita ad salumi e pan. In ver al custìn sem passadi davanti a la butiga ad Carmela e a quela dal Partùr, poe sem rivadi al Brindisino: l’ustaria ad Paulìn dal Nanòn indue al sabat da sira i giun i balèvu cun la musica dal giuboss.Ho sentud la vuz dal Moru che l’ha urdinad: “Noi vogliam Dio” : tuti i bandisti vestidi ad bianch iàn cambiad al spartid; l’ultim l’èra Bigìn Sculìn, che tut sudad al finiva pu da picà al tambur e da dagh urdini a Buda, che al perdèva sempar al pass e al tignèva in man i piatti cume i fussu stai du foei ad carta!Finida la funssiòn, tuti a boeu un bicer ad bianch a l’Acli ufert dal Arcipret, ma da fressa, parchè a mezdì sunad seram bèle ognidun a ca sua, cui pè suta a taul: ravioei in broed e anadot cui patati, i piatti dla sagra ad San German a Sena.
© RIPRODUZIONE RISERVATA
